Plantun de Prouvènço

Pèr coumpara dos planto d'encò nostre

Persicaria lapathifolia & Humulus lupulus

Persicaria lapathifolia

Polygonaceae

Noms en français : Renouée à feuilles d'oseille, Renouée à feuilles de patience.

Descripcioun :
Planto coumuno de ribiero e de prado umido. Li flour podon èstre roso o blanco. Se destrìo de Persicaria maculosa, pas pèr la taco sus la fueio que pòu l'agué elo peréu, mai pèr sa formo de fueio mai largo, l'absènci de péu sus la pichoto membrano subre li nous (ocrea -vèire la fotò) e peréu qu'a un pecou cubert de pichòti gibo (fotò).

Usanço :
Persicaria lapathifolia ajudo à lucha contro li proublèmo de saunamen ( règlo...), contro l'inflamacioun e peréu lou quiéu tapa. Li jouìni fueio se podon manja, mai pas de trop que i'a, coume pèr lis eigreto e li patiènci, d'acide óussali.

Port : Erbo
Taio : Pancaro entresigna
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Persicaria
Famiho : Polygonaceae

Ordre : Caryophyllales

Coulour de la flour : Roso
Petalo : 3
Ø (o loungour) flour : Pancaro entresigna
Flourido : Estiéu

Sòu : Ca
Autour basso e auto : 0 à 1200 m
Aparado : Noun

Liò : Ribiero - Prado umido
Estànci : Pancaro entresigna
Couroulougi : Pancaro entresigna
Ref. sc. : Persicaria lapathifolia (L.) Delarbre, 1800 (= Polygonum lapathifolium L., 1753 )

Óubloun

Humulus lupulus

Cannabaceae

Àutri noum : Barbouto, Vigno-dóu -Nord.

Noms en français : Houblon, Houblon grimpant.

Descripcioun :
Cadun counèis li pigno (enflourejado) dóu óubloun que douno à la biero soun goust. Es uno planto coumuno au nostre dins li relarg umide e proche d'aigo. Se recounèis peréu à si fueio di tres partido (de cop que i'a entiero) e à si lòngui liano.

Usanço :
Aleva pèr la biero, li pigno podon perfuma mant uno bevèndo o èstre manjado. Ajudon à dourmi (dins d'ùni relarg se n'en fai de coussin). Fau saupre peréu que li jóuini cambo soun manjadisso coume d'espargo. Ei poussible d'utilisa li tijo pèr la banastarié.